اُسے کیسے مناؤ گے
اگر ناراض ہو کوئی
شکایت ہو جسے آنکھیں تمہاری
رخ بدلتے منظروں کی جستجو میں
اُس کے چہرے پر نہیں رہتیں
نگاہیں ٹک نہیں پاتیں
سدا آوارہ رہتیں ہیں
کہ جیسے ہوں
سمندر کی وہ لہریں جو
لبِ ساحل سے ٹکرا کر
کہیں اپنے ہی اندر کی توانائی کو گرما کر
کمال اک شوق سے بہتی ہوں منزل کو
کسی انجان منزل کو
عقب میں دم بدم مٹتے ہوئے
نقشِ مسلسل کے سوا کچھ بھی نہ رہتا ہو
کنارا اک ٹھکانہ ہے
جہاں ساحل تماشا کے لئے ہر موج نے
اک بار آنا ہے
اُسے کیسے بتاؤ گے
کہ یہ سب عین فطرت ہے
ادا و عشوہ و رخسار و خال و خط
ٹھکانہ ہے گھڑی بھر کا
نگاہوں کے لئے
پہلو بدلنے کا بہانہ ہے
مگر یہ سب
اُسے کیسے بتاؤ گے
اگر ناراض ہو کوئی
اُسے کیسے مناؤ گے
حسین الطاف
No comments:
Post a Comment