تم سے مُمکن ہے تو سب روشنیاں گُل کر دو

کنج مہتاب سے تا گوشہءِ دربارِ شاہی

مثلِ ویرانیِ جاں، صورتِ دامان تہی

وہ اندھرا ہو کہ ہر رنگ پریشاں ٹھہرے

آنکھ پلکوں کی رفاقت سے گُریزاں ٹھہرے

گھر کا روزن کسی جُگنو کی کِرن کو ترسے

ہر طرف شامِ غریباں کی اُداسی برسے

شاخ در شاخ اُترنے لگے وحشت کا عذاب

شورشِ موجِ ہوا، صورِ اسرافیل لگے

رقص کرتے ہوئے بے خواب بگولوں کے بدن

راہگزاروں کی تھکن اوڑھ کے شَل ہو جایئں

ماند پڑ جایئں سِتاروں کے قبیلوں کی رسُوم

جاگتے شہر تہہ خاکِ زمیں ہو جایئں .....!!

شہ رگِ وقت میں سیال سیاہی بھر دو

تم سے مُمکن ہے تو سب روشنیاں گُل کر دو

سب در و بام بجھا دو کہ میرے سینے میں

زخم در زخم فروزاں ہیں لہو کی شمعیں

جن سے کترا کے گزرتی ہے اندھیروں کی قطار

لشکرِ شام و سحر جن کی لووں سے لرزاں

جن کی حِدت سے ہواؤں کو پسینہ آئے

جن سے جذبوں کو دہکنے کا قرینہ آئے

تیرگی اور بڑھا دو کہ میری آنکھوں میں

اشک در اشک منور ہیں ستاروں کے چراغ

جن کی ضو چوم کے خورشیدِ قیامت اُبھرے

جن کے سائے میں ہمکتی ہوئی اُمیدوں کا

جشنِ نوروز کی صورت قد و قامت اُبھرے

جن کے رنگوں میں ڈھلیں عصر درخشاں کے نقوش

جن کا پرتو سبھی زروں کی جبیں پر اُترے

کہکشاں جن کی زیارت کو زمیں پر اُترے

چاند سے نقش مِٹا دو کہ میرے ہونٹوں پر

حرف در حرف دمکتے ہیں دلِ زار کے داغ

جن کی خُوشبو سے پِگھلتا ہے دو عالم کا دماغ

جن کی تابندہ مزاجی سے نگیں شرمندہ

جو بکھرتے ہیں تو رنگوں کی دھنک ٹوٹی ہے

جن کے پہلو سے کئی صبحوں کی پو پھوٹتی ہے

تم سے مُمکن ہے تو سب روشنیاں گُل کر دو

تم سے مُمکن ہے، مگر تم سے کہاں مُمکن ہے ؟

رشتہءِ نکہتِ گُل ، گُل سے جدا ہو جائے

سنگ سے رنگ ، ہوا خود سے خفا ہو جائے

یاد رکھنا.. .. کہ تمہیں یاد رہے یا نہ رہے

جب تلک راہ میں دیوارِ قضا حائل ہے

میری فریاد میں ، تیشے کا ہنر جاری ہے

جب تلک شہرِ دل و جاں کے کسی گوشے میں

صبحِ گُلرنگ کی منزل نہ دکھائی دے گی

"شب کے صحرا میں ستاروں کا سفر جاری ہے "

( محسن نقوی )

Tum sy mumkin Ho To sab Roshniyan gul Kar Do
Kunj-e-Mahtab sy Ta gosha-e-Darbar-e-shahi
Masl-e-wirani-e-jan, Soorat-e-Daman-e-Tahi
Woh andhera Ho K Her Rang Parishan Thehray
aankh palkon Ki Rifaqat sy gurizan Thehray
ghar Ka roozan Kisi jugnoo Ki Kiran Ko Tarsay
Har Taraf sham-e-gharibaan Ki Udasi Barssay
Shakh Dar shakh Utarnay Lagay wehshat Ka Azaab
Shoorish-e-Maoj-e-Hawa, Soor-e-israfeel Lagay
Raqs kartay howay Be-khawab Bagolon K Badan
Rehguzaron Ki Thakan oarh K shal Ho jayein
Maand parr jayen Sitaron K Qabilon Ki Rasoom
Jagtay Sheher Teh-e-Khaak-e-Zameen Ho jayein
Sheh Rag-e-Waqt mein Sayyal Siyahi Bhar Do

Tum sy mumkin Ho To sab Roshniyan gul Kar Do
Sab Dar-o-Baam Bujha Do K meray Sinay mein
Zakhm Dar Zakhm Farozan Hein Lahoo Ki Shammein
jin sy Katra K guzarti hai Andheroon Ki Qatar
Lashkar-e-Shaam-o-sahar jin Li loowon sy Larzaan
Jin Ki Hiddat sy Hawaon Ko pasina aaye
Jin sy jazbon Ko Dehknay Ka Qarina aaye

Teergi aur Barha Do Keh meri aankhon mein
ashk Dar ashk Munawwar Hein Sitaroon K chiraagh
jin Ki Zoo choom K Khursheed-e-Qayamat ubhray
jin K saaye mein Humakti hoi Umeedon Ka
Jashn-e-naoroz Ki Soorat qad-o-Qamat ubhray
jin K Rungon mein Dhalein asr-e-Darakhshan K Naqoosh
jin Ka partao sabhi zarron Ki jabin par utray
Kehkashan jin Ki Ziyarat Ko Zameen par utray

Chand sy naqsh mita Do K meray Hhonton par
Harf Dar Harf damaktay Hein Dil-e-Zaar K Daagh
Jin Ki Khushboo sy pighalta hai Do aalam Ka Dimagh
Jin Ki Tabinda mizaji sy nighein Sharminda
jo bikhartay Hein To Rangon Ki Dhanak Toot'ti hai
Jin K pehloo sy Kayi subhon Ki pao phoot'ti hai

Tum sy Mumkin Ho To sab Roshniyaan gul Kar Do
Tum sy mumkin hai, Magar Tum sy Kahan mumkin hai?
Rishta-e-nikhat-e-gul, gul sy juda Ho jaye
Sang sy Sang, Hawa Khud sy Khafa Ho jaye
Yaad rakhna K Tumhein Yaad rahay Ya Na rahay
jab Talak rah mein Deewar-e-Qaza Ha,el hai
Meri Faryad mein, Teshay Ka Hunar jari hai
Jab Talak Sheher-e-Dil-o-Jan K Kisi goshay mein
Subh-e-gulrang Ki manzil Na Dikhai Day gi
Shab K sehra mein Sitaron Ka Safar jari hai...!!!

(Mohsin Naqvi)