Humsafar

__ ہمسفر __

تمہارا نام کچھہ ایسے میرے ہونٹوں پہ کھلتا ہے

اندھیری رات میں جیسے

اچانک چاند بادل کے کسی کونے سے باہر جھانکتا ہے

اور سارے منظروں میں روشنی سی پھیل جاتی ہے

کلی جیسے لرزتی اوس کے قطرے پہن کر مسکراتی ہے

بدلتی رت

کسی مانوس سی آہٹ کی ڈالی لے کے چلتی ہے

تو خوشبو باغ کی دیوار سے روکے نہیں رکتی

اسی خوشبو کے دھاگے سے میرا ہر چاک سلتا ہے

تمھارے نام کا تارا

میری سانسوں میں کھلتا ہے

تمہیں میں دیکھتا ہوں جب

سفر کی شام سے پہلے

کسی الجھی ہوئی گمنام سی چنتا کے جادو میں

کسی سوچے ہوۓ بے نام سے لمحے کی خوشبو میں

کسی موسم کے دامن میں ، کس خواہش کے پہلو میں

تو اس خوش رنگ منظر میں

تمہاری یاد کا رستہ

نجانے کس طرف سے پھوٹتا ہے

اور پھر ایسے میری ہر راہ کے ہمراہ چلتا ہے

کہ آنکھوں میں ستاروں کی گزر گاہیں سی بنتی ہیں

دھنک کی کہکشائیں سی

تمھارے نام کے ان خوشنما حرفوں میں ڈھلتی ہیں

کہ جن کے لمس سے

ہونٹوں پہ جگنو رقص کرتے ہیں

تمھارے خواب کا رشتہ

میری نیندوں سے ملتا ہے

تو دل آباد ہوتا ہے

میرا ہر چاک سلتا ہے

" تمھارے نام کا تارا مری راتوں میں کھلتا ہے "

( امجد اسلام امجد )