Shabdoon Ka Chok

موچی ہی ہوں

شبدوں کے اک چوک میں بیٹھا

کیفیّت کی دری بچھائے

پھٹے پرانے جذبے گانٹھتا رہتا ہوں

جب آنسو میلے ہو جائیں

نظم کی اُجلی پالش سے چمکا دیتا ہوں

اب وہ جذبے ہوں یا جوتے

سینا تو سینا ہوتا ہے

جوتوں کے سلنے میں بھی محنت ہوتی ہے

لیکن پھر بھی

جذبوں کے سینے میں وقت بہت لگتا ہے..!

پھٹے ہوئے جذبوں میں ٹانکا بھرتے بھرتے

دھیان ذرا سا بھی ھٹ جائے

ہاتھ نہیں زخمی ھوتا ہے

دل ہوتا ہے .. !

دل کے ذخم ھمیشہ گہرے ہوتے ہیں

زخم کو گہرا ہونا بھی تو چاہئیے ہے

گہرا زخم ہی گہری نظم عطا کرتا ہے

اور یہ نظمیں

کہیں کہیں سے کھردری تو ھو سکتی ہیں

لیکن سچ کا ٹانکا پورا اور پکّا ہے

چُھو کر دیکھو

یہ اک موچی کی نظمیں ہیں ۔۔ 

موچی ہی ہوں

شبدوں کے اک چوک میں بیٹھا ۔۔ !

-

علی زریون