حسینہ، بال سُلجھاؤ!
اُلجھتی سانس سے سینے کے اُلجھاؤ نہیں جاتے
ھمارے ساتھ مت آؤ، یہ کچی عُمر کے گھاؤ
صدا کے تار سے سِلتے نہیں
جاؤ ۔۔۔۔۔۔۔ تمہیں رستے بُلاتے ھیں
نئے رستے کی منزل سے ھمارا ذکر مت کرنا
ھمارا کیا
پُرانے زخم لے کر جا رھے تھے
اِک عجب سا راستے میں بَل پڑا ھے
ساتویں جانب مسافر چل پڑا ھے
اس طرف آتی صدا بے سود ٹھہرے گی
پُکاروں کی لگامیں کھینچ رکھو
سواری رُک نہیں سکتی!
بھری آنکھوں سے خالی راہ تکتی سوگواری نے
بہت تاخیر کر دی ھے
بگوُلے بَین کرتے ھیں
کوئی دو مُٹھیاں مٹی کی، تُربت پر نہ ڈالے تو
وھی مٹی وہ اپنے سر میں ڈالے گا!
برستے آنسوؤں سے کب سروں کی خاک دُھلتی ھے
دَبی چیخوں سے چلتے پاؤں کا رُخ موڑنا مُمکن نہیں ھوتا
کہیں جانے کی جلدی ھو
تو پھر نوحہ گری، گریہ گزاری کون سُنتا ھے
مُسافر چل پڑا ھے
تم صدائیں روک سکتی ھو، سواری رُک نہیں سکتی!
سمیٹو بَین، بِکھرے بال سُلجھاؤ
یہ آنسُو پونچھ لو
اِتنا بھی انساں کا نمک اَرزاں نہیں ھوتا
کہ دو اشکوں سے دُھل جائے!
پشیماں سِسکیاں، آھیں، دُعائیہ لفظ اپنے پاس ھی رکھو
لرزتے لب نہ لرزیں اب
اِنہی خاموش ھونٹوں سے
کبھی جیتے سَمے جو تین لفظوں کی کمائی کر نہیں پایا
تو اب جاتے سَمے تم سے مُسافر کیا کمائے گا
ھوا میں جُھولتے بازو یہ کہتے ھیں
پلٹ جاؤ ۔۔۔۔۔۔۔ ھمارے ساتھ مت آؤ
ھماری چار شانوں پر سواری چل رھی ھے
اور مُسافر رُک نہیں سکتا!
------------------------------------------
شہزاد نیر
No comments:
Post a Comment