Naraaz

ناراض

رات ہم سے دیر دیر تک ناراض رہتی ہے

ہمیں غصہ آتا ہے

بہت سہارتے ہیں تو جنجھلا جاتے ہیں

اور بے بسی سے روہانسے ہو جاتے ہیں

اور آنسوؤں سے لبا لب بھرے ہوئے کٹوروں کے باوجود

ہنس دیتے ہیں

جیسے کسی نے عمر قید کاٹنے والے کسی کو

ہنسنے کی بیگار پر لگا دیا ہو

رات ہم سے دیر تک ناراض رہتی ہے

اور ہمارے سینے پر

بھاری بھرکم سوچیں لا دھرتی ہے

اور ذار دور کھڑی ہو کر

ہمارے طرف نوکیلے اور سخت خدشے اچھالتی ہے

اچھالتی کیا ہے زور سے دے مارتی ہے

ہمارے آنسوؤں کو اندر سے ہمارے دل سے باندھ دیتی ہے

سانسوں کی بھیگی ہوئی رسیاں کستی چلی جاتی ہے

رسیاں بار بار کھینچتی ہیں

دل بار بار ڈوبتا ہے

دل بار بار ڈوبتا ہے رات پھر بھی ہم سے ناراض رہتی ہے

رات ہم سے دیر دیر تک ناراض رہتی ہے

فرحت عباس شاہ