میرے عزیزو
مجھے محبت سے تکنے والو
مجھے عقیدت سے سننے والو
میرے شکستہ حروف سے اپنے من کی دنیا بسانے والو
میرے الم آفریں تکلم سے انبساطِ تمام کی لازوال شمعیں جلانے والو
بدن کو تحلیل کرنے والی ریاضتوں پر عبور پائے ھوئے , سکوں کو تجے ھوئے بے مثال لوگو
حیات کی رمزِ آخریں کو سمجھنے والو
میرے کرموں کی آخری موج میری سانسوں میں گھل چکی ھے
میں اپنے ھونے کی آخری حد پہ آ چکا ھوں
تو سن رھے ھو مرے عزیزو
میں جا رھا ھوں
میں اپنے ھونے کا داغ آخر کو دھو چلا ھوں
مجھے نہ اب انت کی خبر ھے
نہ اب کسی چیز پر نظر ھے
میں اب تو صرف اتنا جانتا ھوں
کہ جہل کے سکوتِ کامل کے جہلِ مطلق
(کہ علمِ مطلق ھے)
جہلِ مطلق کے بحر بے موج سے ملوں گا تو انت ھو گا
اس التباسِ حیات کا ........ جو تمام دکھ ھے
میں دکھ اٹھا کر
میرے عزیزو میں دکھ اٹھا کر حیاتِ کی رمزِ آخریں کو سمجھ گیا ھوں
تمام دکھ ھے
وجود دکھ ھے..... وجود کی یہ نمود دکھ ھے
حیات دکھ ھے.... ممات دکھ ھے
یہ ساری موھوم و بے نشاں کائنات دکھ ھے
شعور کیا ھے؟؟؟
کہ التزامِ وجود ھے اور وجود کا التزام دکھ ھے
جدائی تو خیر آپ دکھ ھے , ملاپ دکھ ھے
کہ ملنے والے جدائی کی رات میں ملے ھیں
یہ رات دکھ ھے
یہ زندہ رھنے کا باقی رھنے کا شوق, یہ اھتمام دکھ ھے
سکوت دکھ ھے کہ اسکے کربِ عظیم کو کون سہہ سکا ھے
کلام دکھ ھے کہ کون دنیا میں کہہ سکا ھے جو ماورائے کلام دکھ ھے
یہ ھونا دکھ ھے
نا ھونا دکھ ھے
ثبات دکھ ھے
دوام دکھ ھے
میرے عزیزوووووو
تمام دکھ ھے
No comments:
Post a Comment