Mujh sy puchtay hain Log

مجھ سے پوچھتے ہیں لوگ

کس لئیے دسمبر میں

یوں اداس رہتا ہوں

کوئی دکھ چھپاتا ہوں

یا کسی کے جانے کا

سوگ پھر مناتا ہوں

آپ میرے البم کاصفحہ صفحہ دیکھیں‌ گے

آئیے دکھاتا ہوں ضبط آزماتا ہوں

سردیوں کے موسم میں گرم گرم کافی کے

چھوٹے چھوٹے سپ لے کر

کوئی مجھ سے کہتا تھا

ہائے اس دسمبر میں کس بلا کی سردی ہے

کتنا ٹھنڈا موسم ہے کتنی یخ ہوائیں ہیں

آپ بھی عجب شئے ہیں

اتنی سخت سردی میں ہو کے اتنے بے پروا

جینز اور ٹی شرٹ میں کس مزے سے پھرتے ہیں

شال بھی مجھے دے دی کوٹ بھی اڑھا ڈالا

پھر بھی کانپتی ہوں میں

چلئیے اب شرافت سے پہن لیجئے سویٹر

آپ کے لئیے میں‌ نے، بن لیا تھا دو دن میں

کتنا مان تھا اس کو میری اپنی چاہت پر

اب بھی ہر دسمبر میں اسکی یاد آتی ہے

گرم گرم کافی کے چھوٹے چھوٹے سپ لیتی

ہاتھ گال پر رکھے حیرت و تعجب سے

مجھ کو دیکھتی رہتی اور مسکرا دیتی

شوخ و شنگ لہجے میں مجھ سے پھر وہ کہتی تھی

اتنے سرد موسم میں

آدھی سلیوز کی ٹی شرٹ!ٓ

"*میل شاوانیزم" ہے

اس قدر نہ اترائیں سیدھے سیدھے گھر جائیں

اب کی بار جب آئیں

براؤن ٹراؤزر کے ساتھ بلیک ہائی نیک پہنیں

کوٹ ڈھنگ کا لے لیں

ورنہ میں‌ قسم سے پھر ایسے روٹھ جاؤں‌ گی

سامنے نہ آؤں گی

ڈھونٹتے ہی رہئیے گا !

پاس بیٹھے ابّو کے آپ سنتے رہیئے گا

تبصرے سیاست پر

کافی لے کے کمرے میں، پھر کبھی نہ آؤں‌ گی

خالی خالی نظروں‌ سے آپ ان خلاؤں‌ میں

یوں ہی تکتے رہئیے گا

اور بے خیالی پر ڈانٹ کھاتے رہئیے گا

کتنی مختلف تھی وہ

سب سے منفرد تھی وہ

اپنی ایک لغزش سے

میں نے کھو دیا اسکو

اب بھی ہر دسمبر میں اسکی یاد آتی ہے

گرم گرم کافی کے چھوٹے چھوٹے سپ لیتی

ہاتھ گال پر رکھے حیرت و تعجب سے

مجھ کو دیکھتی رہتی اور مسکرا دیتی

اب بھی ہر دسمبر میں اسکی یاد آتی ہے

-

خلیل اللہ فاروقی