Udaasi Tergi hoti to shayed

اداسی تیرگی ہوتی تو شاید

اٍک دیا آباد کرنے سے ہی چھٹ جاتی

مگر ایسا نہیں ہے

اداسی راستہ ہوتی

تو اسکو اپنے پیروں سے گنا کرتے

کہیں‌تو جا کے گنتی ختم ہوجاتی

مگر ایسا نہیں‌ ہے

اداسی پیڑ ہوتی تو

ہم اسکے سارے بازو کاٹ کے معذور کر دیتے

زمیں سے اس کا سایہ دور کر دیتے

مگر ایسا نہیں ہے

اداسی سال ہی ہوتی

تو ہم خود کو یہ سمجھاتے

کہ دیکھو تین سو پینسٹھ دنوں کی بات ہے ساری

اداسی پھر نہیں ہوگی

مگر ایسا نہیں‌ہے

اداسی دائرہ ہوتی

تو ہم اس سے کسی تسنیخ کے خط کی طرح باہر نکل جاتے

کوئی تو ایسا لمحہ مل ہی جاتا

ہم سنبھل جاتے

مگر ایسا نہیں ہے

اداسی تو اداسی کے سوا کچھ بھی نہیں ہے

یہاں‌ جتنی بھی بارش ہو

یہ مٹی نم نہیں‌ ہوتی

اداسی کم نہیں‌ ہوتی!