"شہر میں صُبح"
ن م راشد
-
مجھے فجر آئی ھے شہر میں
مگر آج شہر خموش ھے!
کوئی شہر ھے،
کِسی ریگ زار سے جیسے اپنا وصال ھو!
نہ صدائے سگ ھے نہ پائے دزد کی چاپ ھے
نہ عصائے ھمتِ پاسباں
نہ اذانِ فجر سُنائی دے ـــــــــــــ
اب وَجد کی یاد، صلائے شہر،
نوائے دل
مِرے ھم رکاب ھزار ایسی بلائیں ھیں!
اے لوگو!
کہ میں جنہیں کبھی جانتا تھا
کہاں ھو تم؟
تمہیں رات سُونگھ گئی ھے کیا
کہ ھو دور قیدِ غنیم میں؟
جو نہیں ھیں قیدِ غنیم میں
وہ پُکار دیں!
اسی اِک خرابے کے سامنے
میں یہ بارِ دوش اُتار دوُں
مجھے سَنگ و خِشت بتا رھے ھیں کہ کیا ھوُا
مجھے گرد و خاک سُنا رھے ھیں وہ داستاں
جو زوالِ جاں کا فسانہ ھے
ابھی بُوئے خوُں ھے نسیم میں ــــــــــــــ-
تمہیں آن بھر میں خدا کی چیخ نے آ لیا
ـــــــــــــــــــ وہ خدا کی چیخ
جو ھر صدا سے ھے زندہ تر!
کہیں گوُنج کوئی سُنائی دے
کوئی بُھولی بَھٹکی فغاں مِلے،
میں پہنچ گیا ھوُں تمہارے بسترِ خواب تک
کہ یہیں سے گُم شُدہ راستوں کا نشاں مِلے!!!
---------------------------------------------
No comments:
Post a Comment