Kabhi Tum Ne Ye Socha hai

کبھی تُم نے یہ سوچا ہے

جو ہم نے خواب دیکھے ہیں

اگر سب ٹُوٹ جائیں تو

ہماری روح کے اندر اندھیرا پھیل سکتا ہے

اور اِس گہرے اندھیرے میں

کبھی ہم کھو بھی سکتے ہیں

سُنو ایسا کبھی ہو تو مِری یادوں کے جنگل میں

بھٹک کر عمر بھر جاناں کبھی ہلکان مت ہونا

کوئی اپنا دِکھائی دے تو اُس کے ساتھ چل پڑنا

ذرا سی اِس رفاقت میں جو ہم نے خواب دیکھے ہیں

تم اُن خوابوں میں مت رہنا

ضروری تو نہیں جاناں کہ جو کچھ ہم نے سوچا ہے

مقدر میں بھی لِکھا ہو

یہاں اکثر وہی ہوتا ہےجو سوچا نہیں ہوتا

سُنو تم جانتے ہو ناں مقدر ہم نہیں لِکھتے

مِری جاں وقت ہم کو بھی کبھی اُس موڑ پر لایا

کہ میرے ہاتھ سے تیرا اچانک ہاتھ چُھوٹا تو

ہمارا ساتھ چُھوٹا تو

تو میرے ہجر میں خود کو کہیں جوگی نہ کر لینا

جدائی روگ ہے دل کو کہیں روگی نہ کر لینا

سُنو میں تو مُسافِر ہوں

مُسافِر کے مقدر میں سفر ہی ہو تو اچھا ہے

مسافر جان کر میری سبھی یادیں بُھلا دینا

مجھے دل سے مِٹا دینا

کبھی باتوں ہی باتوں میں اچانک یاد آؤں تو ذرا سا مُسکرا دینا

میثم علی آغا